„Доколку данокот на добивка за ИТ-компаниите се намали од 10 на 5 отсто, ќе останат повеќе пари за компаниите. Овие пари ќе се вложат за да се отворат нови работни места, кои ќе бидат повисоко платени работни места за обучени млади луѓе. Тоа ќе биде нивната мотивација да останат во земјава“, изјави потпретседателот на СДСМ, Дамјан Манчевски, на Скопски саем, каде што во тек е одржувањето на саемот „Технома“.
Тој истакна дека еден од најголемите проблеми со кои се соочуваме денес е како да ги задржиме младите луѓе тука.
– Тука да работат и тука да ја гледаат својата иднина. Тоа е можно само доколку обезбедиме шанса за работа и шанса за развој – додаде Манчевски.
