Неколку стотини граѓани и денеска се собраа пред Владата на Република Македонија за да протестираат против прикривањето на убиството на Мартин Нешковски.
Полицијата, како и вчера, го блокираше приодот кон Владата и не им дозволува на демонстрантите да пристапат до неа.
Забележливо е зголемено полициско обезбедување.
Еден од демонстрантите прочита писмо пред полицијата со кое ги повика да ги симнат панцирите и оружјето и да им се приклучат во борбата за слобода на државата. Тие ги повикаа полицајците „да не ги бранат криминалците кои се наоѓаат зад барокната фасада“.
Демонстрантите се упатија кон Јавното обвинителство, каде најавија дека ќе поднесат пријава против полицијата за нарушување на правото на слободно движење. Во меѓувреме, полицијата ги сопре кај Археолошкиот музеј на Македонија и не им дозволи на демонстрантите да стигнат до Јавното обвинителство.
Демонстрантите се во значително помал број во споредба со претходните два дена.
Пред Собранието нема ниту полиција ниту групи граѓани.
