Македонската влада ќе ги следи политиките на ЕУ и ќе воведе забрана за увоз на руска нафта во земјава, информираше денеска министерот за економија Крешник Бектеши по најновата одлука на Европската Комисија да забрани увоз на руско дизел гориво.
Во одговор на новинарско прашање за тоа колкаво количество на руска нафта се увезува во земјава, министерот Бектеши одговори:
„Согласно податоците што ги добиваме од Регулаторната комисија за енергетика во делот на потрошувачката и во делот на компаниите кои имаат лиценца за трговија и на големо и на мало во нашата држава, последните неколку години не повеќе од 20% е користена нафта која доаѓа од руски рафинерии, главно од една компанија која има и бензиски пумпи во нашата држава“, изјави министерот за економија.
Бектеши додава дека забраната за увоз на руска нафта во земјава нема да има големо влијание во делот на снабдувањето со горива и го повтори ставот на владата во однос на санкциите кон Русија дека политиката е генерално да ги следиме сите санкции кои ги носи Европската Комисија и нашите стратешки партнери и таквите мерки ќе продолжат.
Tој очекува во претстојниот период Министерството за надворешни работи да ѝ предложи на владата да се донесе одлуката за забрана за увоз на руска нафта за да се следи одлуката за санкции на Европската Комисија.
По почетокот на руската инвазија врз Украина, Европската Унија воведе серија на санкции кон Русија. Шефицата на Европската Комисија, Урсула фон дер Лајен пред неколку дена вети најнов, десетти по ред пакет санкции против Русија, при што најави дека до 24 февруари годинава ЕУ заедно со земјите од Г-7 ќе воведат дополнително ограничување на цената на руската нафта.