Државата годинава се искачи за две места погоре во однос на лани, на листата земји кои вложуваат во иновации и иновациска структура што резултира во економски напредок, покажува најновиот извештај на Глобалниот иновациски индекс (ГИИ) за 2020 година.
Фондот за иновации и технолошки развој информира дека во Глобалниот извештај кој рангира 130 држави во светот во однос на иновативните перформанси по 80 различни параметри, Македонија е на 57 место, што претставува значителен напредок и се должи, во значајна мера, на вложувањата во микро, мали и средни претпријатија од страна на Владата и Фондот за иновации и технолошки развој во изминатите три години.
„Оваа година државата има голем напредок и во однос на зголемен степен на инвестиции во иновации од страна на домашните институции каде е рангирана на 46-то место што е за шест места повеќе од минатата година, а особено повисоко во споредба со 2018 кога беше на 71-во место. Во однос на постигнатите резултати од иновациите, земјата го задржа 63-то место, како и во 2019 година, односно 30 места повисоко од рангирањето во 2018. Напредок во однос на минатата година има кај индикаторите за квалитет ISO 9001 (ранг: 22) и високо- и средно-високи технолошки производи (21), а значаен успех има и во однос на еколошка оддржливост (17), бизнис климата (30) и заштита на интелектуална сопственост (23),“ информираат од ФИТР.
Во однос на препораките се наведува дека земјата треба да вложи повеќе во образование, подобрување на образовниот систем, како и зголемување на соработката помеѓу бизнис секторот и академската заедница, што е оценета на многу ниско ниво. Дополнително, извештајот посочува на потребата од поголеми вложувања во човечки ресурси и истражувања, во кои се очекува зголемен ангажман на Владата, а за кои ФИТР веќе развива посебни инструменти и програми за поддршка.
Швајцарија и годинава е на прво место, според анализата на ГИИ, а меѓу првите пет се и Шведска, САД, Велика Британија и Холандија, додека на дното се Гвинеја и Јемен.
Извештајот на Глобалниот иновациски индекс на иновации се објавува 13 години по ред од страна на Светската организација за интелектуална сопственост, во партнерство со бизнис школата Инсед и Универзитетот Корнел од САД.
