Македонија во извештајот за напредокот на земјата во интеграциите кон ЕУ, ќе добие препорака за преговори, дознава „Мета“.
Препораката, според високите владини извори, не била спорна, особено зашто веќе е почната реализацијата на Договорот од Пржино, односно изборот на специјален јавен обвинител. Сепак, извештајот, во кој ќе бидат наведени и забелешките од Прибе, како што дознаваме, воопшто нема да биде благ кон проблемите што се провлекуваат неколку години наназад.
Од извори упатени во подготвувањето на извештајот, дознаваме дека и годинава како негативни точки ќе бидат истакнати политичкиот притисок врз судството, партизацијата на администрацијата, проблемите со слободата на медиумите, антикорупцијата и настаните од 24 декември 2012 година, кои веројатно ќе бидат поврзани со блокадата на комисијата за надзор на работата на УБК и на Агенцијата за разузнавање.
Сепак, нацрт-извештајот сè уште е во процес изработка, така што можни се измени на неговата содржина.
Еврокомесарот за проширување, Јоханс Хан, за време на својата посета во Скопје, изјави дека евроинтеграцискиот дух во Македонија е повторно заживеан, но рече дека мала е веројатноста за наскоро да се почнат преговорите, особено затоа што кризата не е целосно завршена, а и спорот со името не е решен.
– Прагматичен сум, мора да одиме чекор по чекор, кризата не е целосно решена. Ако се спроведе договореното, ќе направиме сè за да ги убедиме членките на ЕУ да почнат преговорите. Сепак, тоа не се завршува за неколку месеци – рече еврокомесарот за време на посетата на Скопје.