Република Македонија денеска (2 август) ги слави двата најзначајни историски датума, одбележувајќи 112 години од почетокот на Илинденското востание во 1903 година и од Првото заседание на АСНОМ, во 1944 година.

Централната манифестација за одбележување на празникот ќе се одржи во Крушево на Мечкин Камен, каде е предвидено полагање свежо цвеќе на споменикот на бранителите на Крушевската Република и обраќање на претседателот на државата, Ѓорге Иванов.

Претседателот на Собранието, Трајко Вељаноски, ќе одржи говор на свеченоста во Меморијалниот комплекс АСНОМ во кумановско Пелинце, а премиерот Никола Груевски ќе присуствува и ќе се обрати на одбележувањето на празникот во Скопје, пред споменикот на Методија Андонов-Ченто, претседател на Презедиумот на АСНОМ.

Свои делегации, за одбележеување на празникот ќе има и опозицискиот Социјалдемократски сојуз на Македонија. Како што е предвидено, претседателот на СДСМ, Зоран Заев, ќе присуствува во Пелинце, делагација предводена од заменик-претседателката на партијата, Радмила Шекеринска, ќе биде во Крушево, а на чело на делегацијата во Скопје, ќе биде потпретседателот на СДСМ, Дамјан Манчевски.

Илинденското востание почнало на 2 август, кога на полноќ, околу 800 востаници го ослободиле градот од османлиската војска, а по два дена е прогласена Крушевската Република, првата република на Балканот. За нејзин претседател бил назначен Никола Карев. Крушевската Република траела 10 дена.

Четириесет и една година подоцна, на 2 август 1944 година, во манастирот „Св. Прохор Пчински“ е одржано Првото заседание на Антифашистичкото собрание на народното ослободување на Македонија (АСНОМ). Заседанието го отворил најстариот делегат, Панко Брашнаров. На заседанието бил избран Презедиумот на АСНОМ, а за негов претседател Методија Андонов-Ченто.

На Првото заседание се донесени документи од огромно историско значење за Македонија, а воедно била потврдена положбата на Македонија како рамноправна федерална држава во рамките на Демократска федеративна Југославија.