Дали „Маѓар телеком“ ја почна истрагата во „Македонски телеком“/„Ти-мобајл МК“ во врска со сомнежите за вмешаност во масовно прислушување граѓани и дали извештајот од истрагата ќе биде објавен, односно граѓаните ќе бидат запознаени со неговата содржина?
Овие две прашања, преку електронска пошта, „Мета“ ги испрати до „Македонски телеком“, а одговор ни стигна од газдата – „Маѓар телеком“:
– „Маѓар телеком“, како мнозински акционер, е во постојат контакт со „Македонски телеком“ во врска со ова прашање и планира истрага со помош на надворешни експерти. Во согласност со политиката на компанијата, не сме во позиција да даваме коментари за планираната истрага – стои во мејлот од директоратот за корпоративни комуникации на „Маѓар телеком“.
Дописот до „Македонски телеком“ го испративме вчера претпладне, но до крајот на денот не добивме одговор.
„Мета“ истите прашања ги испрати до германскиот телекомуникациски гигант „Дојче телеком“ и фирма-мајка на „Маѓар телеком“.
Од „Маѓар телеком“ потсетуваат на двете реакции на „Ти-мобајл МК“ по наводите за прислушување и оние за злоупотребите на изборите во 2013 година, кои ги изнесе лидерот на опозицијата, а се однесуваа на дел од содржината на снимките, во кои функционер на власта бара од вработена во „Ти-мобајл“ да исклучат телефонски број, бидејќи СДСМ лобирале преку него за изборите.
Во меѓувреме, добивме и допис од „Дојче телеком“, со идентичен одговор како и од нејзината фирма-ќерка, односно дека „Маѓар телеком“ како директен акционер во случајот, ќе ја води планираната истрага, која ќе биде спроведена од независни експерти и дека е сè уште рано да се зборува за истрагата и за тоа како потенцијалните резултати ќе бидат споделени.
