fbpx
Подглавна секција „Луди нацистистички наркомани“ – како се смени реториката на Медведев од либерална...

„Луди нацистистички наркомани“ – како се смени реториката на Медведев од либерална кон анти-западна?

Фото: Dmitry Astakhov, Government of the Russian Federation - government.ru

Од почетокот на воената инвазија на Русија врз Украина, во февруари годинава, реториката на рускиот екс-претседател Димитри Медведев стана сè пожестока, особено за човек кој претходно не се експонирал премногу во јавноста, а своевремено се сметал за либерален модернизатор. Тој на социјалните мрежи за ЕУ, НАТО и за Украина употребува зборови како „наркомани“, „нацисти“, „им тече плунка од дегенерација“, „војна против Сатаната“, а голем дел од неговите наративи се пренесувани во македонските медиуми или на социјалните мрежи, пишува „Вистиномер“ во својата анализа.

Текстот подолу го пренесуваме во целост:

„Наркомани“, „нацисти“, „им тече плунка од дегенерација“, „војна против Сатаната“. Ваква и слична реторика, користи поранешниот руски претседател Димитри Медведев, опишувајќи ја воената инвазија на Русија врз Украина. И во своите говори, а особено на социјалната мрежа Твитер и на Телеграм, каде што е особено активен, Медведев користи најгруби зборови за Западот, НАТО и за Украина.

Од почетокот на војната, во февруари годинава, неговата реторика стана сè пожестока, особено за човек кој претходно не се експонирал премногу во јавноста, а своевремено се сметал за либерален модернизатор.

Во пораката по повод Денот на националното единство на Русија, Медведев рече дека задачата на татковината е „да го запре врховниот владетел на пеколот, без оглед на името што го користи – Сатана, Луцифер…“ Медведев изјави дека Русија има различни оружја, предупредувајќи дека „Москва може да ги испрати сите свои непријатели во вечните огнови на пеколот“.

Москва се бореше со „лудите нацистички наркомани“ во Украина, поддржани од западњаци на кои им тече плунка од дегенерација по брадата, рече тој.

Поранешниот премиер и претседател, актуелен заменик претседател на Советот за безбедност на Руската Федерација, Димитри Медведев, го отвори својот профил на Телеграм, на 17 март годинава откако почна војната во Украина. Профилот на Медведев на социјалните мрежи оттогаш е посветен на антидемократски, антизападни и анти-НАТО наративи.

Во јуни годинава, Димитри Медведев објасни:

Често ме прашуваат зошто моите објави на Телеграм се толку груби. Одговорот е дека ги мразам. Тие се копилиња и ѓубриња. Тие сакаат смрт, нам, на Русија, напиша Медведев, додавајќи дека додека бил жив, ќе направел сè за да исчезнат.

Тој не појасни дали „тие“ се однесува на Украинците, на западните политичари или, пак, и на едните и на другите.

На социјалната мрежа Твитер, тој има 1,1 милиони следбеници, а тој лично следи само 20 профили. Слична жестока и груба реторика може да се забележи и таму, а во коментарите има голем број луѓе кои го поддржуваат, но и такви кои го критикуваат, а воедно и изразуваат чудење од неговите наративи.

 

Најбрз начин да се донесе конфликтот во Украина до точка од која нема враќање е да се вооружаат психопатите во Киев со ракети со долг дострел. Повозрасните лидери од Вашингтон и од НАТО понекогаш мораат да почнат да го користат нивниот мек мозок, пишува Медведев во октомври годинава.

Во август годинава, пак, Медведев на Твитер имаше обид да стави знак на еднаквост меѓу претседателот на Украина Володомир Зеленски и Адолф Хитлер.

 

Шефот – кловн на Украина предложи да биде „одговорно целото население во Русија“. Адолф Хитлер беше тој што последен се обиде да ги примени таквите идеи на еден народ како целина. Остануваат некакви прашања за природата на украинскиот режим?, гласи твитот на Медведев во август годинава. 

За тоа како на твитер профилот на Медведев растел бројот на неговите следбеници, покажуваат и статистичките податоци од веб-страницата „Трендсмеп“, која ги следи овие трендови. Се гледа дека во 2022 година, наеднаш и со „брзина на светлината“ расте бројката на луѓе кои го следат профилот на експретседателот на Русија.

Фото: Принтскрин, trendsmap.com

Реториката на Медведев наголемо се следи и во земјава. Медиумите ги пренесуваат неговите изјави и написи на социјалните мрежи, во кој тој буквално со гадење зборува за Западот, НАТО и за Украина.

Со посебно внимание беше пренесен твитот кога Медведев на Твитер го повика Илон Маск, најбогатиот човек на светот и новиот сопственик на Твитер, да ја исклучи сателитската интернет услуга во Украина. Медведев му честиташе на Маск за „надминувањето на политичката пристрасност и идеолошката диктатура на Твитер“.

И откажи се од тој бизнис со Старлинк во Украина, напиша Медведев.

Воедно и Маск се впушти во бизарен разговор на Твитер со Медведев.

Откако Медведев на Твитер објави: „Збогум Лиз Трaс, честитки за салатата“, алудирајќи на оставката на британската премиерка, чие владеење во Британија се споредуваше со времетраење на главица зелена салата, Маск одговори: „Доволно добро тролање, да бидам искрен“. На тоа, Медведев возврати: „Се гледаме во Москва на Денот на победата“.

Македонските медиуми ја пренесоа и последната изјава на Медведев (15.11.2022) на Телеграм, кој го коментираше гласањето во Обединетите Нации за резолуцијата со која се бара воспоставување механизам за Русија да ѝ плати воена отштета на Украина. ОН: Русија да плати репарации на Украина, Медведев бара САД да ѝ платат на Србија, гласи само еден од насловите пренесени во македонските медиуми.

Откако донесе резолуција Русија да ѝ плати отштета на Украина, Генералното собрание на Обединетите нации сега треба да ги повика САД да им платат отштета на Кореја, Виетнам, Ирак, Југославија и други земји, напиша Медведев на Телеграм.

Во земјава на социјалните мрежи се споделуваат и тврдења на Медведев кои тој ги споделува на руската социјална мрежа Vk.com, а Вистиномер веќе има дебанкирано дел од нив.

Кога Димитри Медведев стана претседател на Русија во 2008 година, тој беше првиот лидер на земјата во последните децении без познати врски ниту со поранешната Советска Комунистичка партија ниту пак со тајните служби.

Сепак, Медведев – квалификуван адвокат – беше исклучително близок со неговиот претходник Владимир Путин, поранешен агент на КГБ. Тој водеше кампања како штитеник на Путин и се врза за неговата политика веднаш штом победи на изборите во 2007 година.

Ќе можеме да го зачуваме курсот на претседателот Путин, рече тој тогаш.

Во 2012, тие ги сменија позициите – Путин стана претседател третпат, а Медведев се врати на позицијата премиер, до 2020 година.

Според ставовите на некои аналитичари, се чинело дека претседателството на Медведев ветува позитивни промени, и во Русија, но и во врските со Западот, сигнализирајќи ја „можноста за нов, полиберален период во руската политика“. Подоцна сепак тој почнува да усвојува сè порадикални позиции.

Кон крајот на јуни, кога продолжи руската војна против Украина, 27-годишниот Илија Медведев – син на Димитри Медведев – официјално стана член на владејачката партија „Единствена Русија“ на Путин. Ова се случи само неколку недели по непотврдените извештаи дека САД му ја откажале визата на Илија Медведев, кој живеел во Калифорнија, САД, и му дале два дена да ја напушти земјата. Оваа вест сè уште не е официјално потврдена.

Пишува: Мери Јордановска

 

***

Овој напис е изработен во рамките на проектот Промовирање на пристап до веродостојни вести за борба против дезинформации, имплементиран од Фондацијата Метаморфозис. Написот, кој е првично објавен во Вистиномер, e овозможен со поддршка на американската непрофитна фондација NED (National Endowment for Democracy). Содржината на написот е одговорност на авторот и не секогаш ги одразува ставовите на Метаморфозис, НЕД или нивните партнери.