Грчкиот премиер Алексис Ципрас и лидерите на мнозинството грчки партии денеска ќе се соочат на лидерска средба во претседателската палата. На политичкото „мени“ ќе се најдат бегалската криза, но и голем број внатрешни политички проблеми, кои повторно создаваат имиџ на раздор отколку на соработка меѓу сите политички сили за излез од финансиската криза.
Покрај бегалската криза, која особено по оградата на македонска страна и засилените контроли за приливот на бегалци создава голема тензија во Грција, Ципрас заедно со лидерите на Нова демократија, ПАСОК, Река, Незавицни Грци и Партијата на центристите ќе разговара за неопходноста за национален дијалог, компромис и разбирање за клучните теми и реформи кои европските партнери ги очекуваат од Грција, а за кои мнозинството партии ги поддржаа летово за Грција да избегне проблематично исклучување на државата од еврозоната.
Според информациите, Ципрас нема да бара строго национално единство, туку конструктивен дијалог со сите страни за подобро справување со ситуацијата. Дали ќе успее идејата за соработка на Ципрас со целиот спектар политички партии во грчкиот парламент ќе успее, ќе се види по завршувањето на средбата.
Првичните коментари на лидерите на опозициските партии дека Ципрас со ова покажува дека не е способен целосно сам да донесе одлуки, сепак, тешко влеваат оптимизам во Грција дека би можело да се постигне национално единство и поголема поддршка за реформите што државата ќе мора да ги примени за да остане во колосек за нејзината европска иднина.
Премиерот Ципрас преку државната телевизија испрати порака дека бегалската криза не е проблем на една држава, туку веќе прерасна во хуманитарна криза. Побара помош од Европа за подобро справување со овој проблем.
„Ја предупредивме Европа дека оградите и затворените граници ќе доведат до безизлез. Европа се соочува со поголема опасност ако го ограничи слободното движење и поради тоа е неопходно ефикасно справување со бегалската криза“, истакна Ципрас.
Тој посочи дека државата се придружува до обврските договорени во ЕУ за изградба на прифатилишта и на центри за регистрирање на бегалците.
„Европа треба да разбере дека Грција ги чува границите на ЕУ. Ниту оградите ниту, пак, префрлањето на проблемот од една во друга држава може да ги запрат бегалците кои бегаат од војната и од сиромаштијата“, додаде Ципрас.
