fbpx

Либерализацијата на железничкиот превоз се одложува до крајот на 2022 година

-

Усвојувањето на пакетот на Законите за железници што го регулира прашањето на либерализација е одложено до декември 2022 година, информираат за Мета.мк од Владата на РСМ. Исто така, за евентуалното реструктуирање на Железници на РСМ – Транспорт, како најголем државен загубар, ќе се чека на завршување на анализата за преструктуирање, која во моментов се изготвува.

„Во овој момент консултантска куќа работи на изработка на бизнис сегментација на претпријатието и сè додека не се изготват моделите на преструктуирање на тоа претпријатие не може да се зборува за отворање на пазарот. Очекуваме следната година оваа анализа да биде изготвена“, велат од извршната власт.

Ваквиот одговор од Владата следува откако Европската Комисија и во најновиот Извештај за реформскиот напредок на земјава за 2021 година побара имплементација на реформи во железничкиот сектор, кои би значеле губење на монополот на Железници на РСМ – Транспорт во однос на организирањето на железничкиот сообраќај.

Европската Комисија бара да се отвори пазарот преку влез на нови транспортни компании што ќе може да сообраќаат по нашите пруги. Либерализацијата во делот на железничкиот превоз е барање на ЕУ старо речиси една деценија наназад и досега било наведено и во претходните извештаи на Европската Комисија.

Бизнис сегментацијата на Железници на РСМ – Транспорт би подразбирала поделба на претпријатието на посебни фирми за товарен и патнички железнички сообраќај, по примерот на реформите кои веќе ги имаат направено и земјите од регионов – Хрватска, Србија, Црна Гора, Романија и други. Наспроти ова, Грција целосно го приватизираше државното железничко претпријатие уште пред неколку години.

Владата и премиерот Зоран Заев пред една година најавија можност за воспоставување на јавно-приватно партнерство или приватизација на Железници на РСМ – Транспорт, но ваквиот потег ќе се пролонгира со најновата владина одлука да се почека студијата за бизнис сегментација на државното железничко претпријатие.

Инаку, главниот проблем со којшто се соочува Железници на РСМ – Транспорт, а со тоа и функционирањето на железничкиот превоз во земјава, е натрупаниот долг на претпријатието, а којшто вклучува долгови со камати во висина од неколку милиони евра кон Хрватските и Бугарските железници создадени во текот на 90-тите години на минатиот век. Поради сериозната висина на вредноста на каматите кон овие долгови кон Хрватските железници, самото претпријатие уште на почетокот од годинава предупреди дека постои опасност од присилна наплата на долговите.

Нашите вести во вашето сандаче

Секој ден во 17 ч. добивајте ги вестите од Новинската агенција Мета директно на вашата електронска адреса.

Ве молиме одберете на кој начин сакате да добивате информации од нас:
Можете да се отпишете од оваа листа преку линкот на крајот од нашите пораки.

„Шорткат“: Апликацијата ДИА како асистент на лицата со дијабетес

Во вечерашното издание на емисијата „Шорткат“ ги имаме Ѓорѓина Ристовска и Марио Мијатовиќ - млади иноватори кои ја креираа апликацијата ДИА, како асистент на лицата со дијабетес. Инспирирани од...