Активистите од ЛГБТИ-заедницата, од Националната мрежа за борба против хомофобија и трансфобија и граѓани, денеска прогласија мораториум на секаква соработка со Владата.

Тие поставија и посмртен венец пред Владата во знак на револт за начинот на кој таа се однесува кон оваа заедница.

ЛГБТИ-венец-пред-влада

Активистите велат дека пред две години, кога почна одбележувањето на Неделата на гордоста, во ЛГБТИ-центарот за поддршка активистите биле нападнати од маскирани лица во присуство на полицијата, а случајот и по две години не е решен.

– Како рефлексија на целокупното владеење на Никола Груевски, со бандата што седи во неговата влада, во оваа држава, образованието продолжува и е извор на хомофобија и на ширење конзервативизам и востоличување на патријахалните вредности. Универзитетите ја изгубија својата автономија, а критичката мисла се закопа. Поради хомофобијата во образованието, за солидарност со нашите сограѓани и сограѓанки, бараме оставка од владата на Никола Груевски, на чело со него, и од денеска прогласуваме мораториум на оваа влада. Поради тоа што здравството стана место каде што се усмртуваат млади деца и каде што се дискриминираат сите граѓани, Никола Тодоров и сите претходни министри од оваа влада одбиваат каква било соработка и почитување на основните човекови права на граѓаните на Република Македонија. Бараме оставка, прогласуваме мораториум на оваа влада и на Министерството за здравство – рече активистот Славчо Димитров.

Активистите побара оставки и од министрите за внатрешни работи, труд и социјала и за култура.