На македонските патарини летово поминале над 13,8 милиони возила или за над 740.000 возила повеќе од лани, не вклучувајќи ги оние граѓани што го користеле електронскиот систем на наплата. Јавното претпријатие за државни патишта во текот на јуни, јули и август годинава од патарините остварило вкупни приходи од над 13,6 милиони евра, односно за над 660.000 евра повеќе во споредба со летните месеци од минатата година.
Традиционално, најмногу возила (околу 5,3 милиони) минале низ патарините во август, кога најголем дел од граѓаните и патуваат на одмор. Приходите од плаќањето на овој надоместок во август достигнале речиси 5 милиони евра, не вклучувајќи ги оние возачи што плаќаат со електронските уреди.
Приходите кои државата ги собира од патарина во наредниот период се очекува да се зголемат. Кон крајот на август беше пуштена во употреба новата патарина во Гевгелија на Коридорот 10, а допрва треба да се градат двете патарини на автопатот Миладиновци – Штип.
