Само специјалната обвинителка Катица Јанева знае зошто ние сме вишок или кусок и зошто носи такви одлуки, еднострани, некоректни и несогласни со кодексот на однесување на јавните обвинители, вели во изјава за „Канал 5“, обвинителката Лејла Кадриу, која заедно со својата колешка, Марија Ѓорѓева, пред една недела биле отстранети од тимот на специјалната обвинителка.
„Работев редовно, сите задачи, како и другите обвинители што се таму. За тоа каде настана проблем, ќе ја прашате Катица Јанева. Таа не рече ништо освен дека не сме дел од тимот. Толку. Ништо не ни објасни. Ние прашавме, ама ништо. Немаше никакви несогласувања до моментот кога ни рече да излеземе од канцеларија и да ги предадеме предметите. Немаше никаква забелешка, ни усмена, ни писмена. Ние работевме на предмети, а тие се предадени со записник за примопредавање на колегите. Советот за тоа викаше од почеток дека се доволни седум обвинители, а обвинителката мислеше дека требаат повеќе. Ѝ се удоволи на нејзиното барање“, вели Кадриу.
Од кабинетот на Јанева вчера, по обелоденувањето на промените во нејзиниот тим, од страна на претседателот на Советот на јавни обвинители, Петар Аневски, за „Мета“ рекоа дека според обемот на работа на специјалното обвинителство, во моментов му биле доволно 10 обвинители.
„Утврдено е дека за совладување на обемот на работа со кој се соочува ова јавно обвинителство во овој момент доволни се десет обвинители. Имајќи го предвид фактот дека јавните обвинителства од каде доаѓаат јавните обвинители се соочуваат со недостиг од кадар, што и јавно беше соопштено од Советот на јавни обвинители, предложено е на Советот на јавни обвинители да ги распредели овие обвинители во обвинителствата од кои беа избрани во ова јавно обвинителство“, рекоа вчера за „Мета“ од Специјалното јавно обвинителство.
Двете обвинителки денеска биле сослушани од тричлена комисија на Советот на јавни обвинители, која треба да го расчисти случајот.
