Авантурата на ВМРО-ДПМНЕ и на нејзиниот лидер, Никола Груевски, да излезат сами на избори, ќе ги загрози евроалтантските интеграции на Македонија, со голема опасност земјата да биде меѓународно изолирана, велат од Либерално-демократската партија на Македонија (ЛДП).
Од партијата велат дека Груевски и ВМРО-ДПМНЕ се „подготвени“ да одат на избори за привремено да си ја купат слободата.
„Власта, која е синоним за криминал и за корупција, токму со неуставната и противправна аболиција се дрзнува да уценува и да се пазари за да побегне од раката на правдата. Аболицијата за привилегираните криминалци од власта мора да се повлече, а предвремените парламентарни избори да се одложат сè додека не се создадат услови за слободни, фер, демократски и веродостојни избори“, стои во соопштението на ЛДП.
Оттаму додаваат дека секој кој се надева на поинаков расплет на политичката криза, „ја манипулира јавноста“.