Настрана од фактот дека таквиот гест на потчинување би бил крајно нереален, проверката на факти сугерира дека сликата е генерирана од апликација за вештачка интелигенција (AL). Алатките за вештачка интелигенција можат да создадат фотореалистични слики кои се полни со детали и тешко се разликуваат од реалните слики, сепак тие редовно произведуваат слики што содржат грешки, особено нереално се претставуваат рацете и ушите. На фотографијата не се гледа ниту лицето на наводниот Путин, кое е целосно надвор од снимката, додека ликот на на Шји е толку матен што е само нејасно препознатлив. Ваква фотографија не може да се најде во базите на ниту една новинска агенција, ниту пак, може да се најдат јасни докази дека сликата не е генерирана од софтвер за вештачка интелигенција, пишува „Вистиномер“ во својата анализа.
Текстот подолу го пренесуваме во целост:
Дали Владимир Путин навистина се спуштил на едно колено и ја бакнал раката на Кси Џинпинг? Ваквa (дез)информација објави веб-порталот МкДенес, прикажувајќи фотографија којашто навидум изгледа така. Но, вистината е дека фотографијата, која наводно била направена за време на неодамнешното патување на кинескиот лидер во Русија, е лажна.
Посетата на кинескиот претседател Кси Џинпинг на Русија стана главен наслов на светските насловни страници. Посетата се случи во време кога Западот ја повикува Кина јасно да се дистанцира од Русија, особено сега кога Меѓународниот кривичен суд издаде налог за апсење на Путин.
По завршување на посетата беше објавена една фотографија која стана вирална на социјалните мрежи, и која наводно го прикажува рускиот претседател Владимир Путин како клечи пред кинескиот претседател Кси Џинпинг. Тоа би бил гест на потчинување со многу симболика – ако сликата не е лажна.
Оваа фотографија е објавена на текст на порталот МкДенес со наслов „ПУТИН НА КОЛЕНА пред Си Џинпинг, Русија пред КИНА“, а потоа освен на нивниот профил на Фејсбук, споделена е и од Фејсбук страница каде што станува вирална.
Но, тоа не е точно. Путин не клекна пред Кси Џинпинг, фотографијата е лажна. Настрана од фактот дека таквиот гест на потчинување би бил крајно нереален, проверката на факти сугерира дека сликата е генерирана од апликација за вештачка интелигенција (AL).
Проверката направена од Дојче Веле покажува дека неколку збунувачки детали на сликата го привлекуваат вниманието.
Задниот чевел на лицето кое клечи – за кое се тврди дека е Путин – е непропорционално голем и широк. Листот на истата нога изгледа испружено. Главата на лицето, иако е половина покриена, е исто така многу голема и не одговара на пропорциите на остатокот од телото. Увото е чудно деформирано и има неколку чудни грутки што другите слики од увото на Путин не ги покажуваат. Увото на главата на она кое што се тврди дека наводно е Кси Џинпинг, изгледа чудно деформирано ако се зумира. Се чини дека рацете на овој човек се споени. Искуството покажува дека сите овие се забележливи проблеми што се појавуваат на сликите генерирани со вештачка интелигенција. Ова се графики создадени од апликации со помош на вештачка интелигенција со намера да изгледаат реално, анализира Дојче Веле.
Алатките за вештачка интелигенција, можат да создадат фотореалистични слики од природни поставки и луѓе, кои се полни со детали и тешко се разликуваат од реалните слики. Сепак, апликациите за вештачка интелигенција редовно произведуваат слики што содржат грешки, особено нереално се претставуваат рацете и ушите и тоа е еден од проблемите со кои се соочуваат генераторите на слики со вештачка интелигенција.
Понатаму, на фотографијата не се гледа ниту лицето на наводниот Путин, кое е целосно надвор од снимката, додека ликот на на Кси е толку матен што е само нејасно препознатлив.
Пребарувањето на официјалните фотографии од државната посета на Кси на Русија, исто така, наведуваат дека фотографијата која што е предмет на оваа рецензија е лажна. Конкретно, баравме детали кои би можеле да бидат слични на сликата за која станува збор. На ниту еден од сервисите за фотографии не е најдовме слики, кои ја прикажуваат наводната потчинетост. Ниту мебелот прикажан на вистински фотографии од државната посета не се совпаѓа со тој од лажната фотографија.
На фотографијата не е потпишан како автор ниту еден фотограф или агенција, само е споделена на социјалните мрежи без други слични фотографии од таа случка.
Иако е можно фотографијата споделена на социјалните мрежи да е направена на друго место, а не да била фатена од медиумите, сепак многу е веројатно дека обезбедувањето околу средбата на двајцата лидери нема да даде можност да се направи таква искрена фотографија, а камоли таа фотографија да протече на интернет.
Сликата на која наводно се гледа како Путин клечи пред Кси Џинпинг е лажна. Не може да се најде во базите на ниту една новинска агенција, ниту пак, може да се најдат јасни докази дека сликата не е генерирана од софтвер за вештачка интелигенција.
Бидејќи нема јасни докази што го потврдуваат потеклото на фотографијата, ниту Путин, ниту Џинпинг не се гледаат јасно, просторијата прикажана на сликата не може да се види никаде на официјалните фотографии од нивните состаноци, а на фотографијата има голем број елементи кои силно сугерираат дека е генерирана од вештачка интелигенција, оценуваме дека оваа објава е невистинита.
***
Овој напис е изработен во рамките на проектот Промовирање на пристап до веродостојни вести за борба против дезинформации, имплементиран од Фондацијата Метаморфозис. Написот, кој е првично објавен во Вистиномер, e овозможен со поддршка на американската непрофитна фондација NED (National Endowment for Democracy). Содржината на написот е одговорност на авторот и не секогаш ги одразува ставовите на Метаморфозис, НЕД или нивните партнери.
