Шефот на руската дипломатија, Сергеј Лавров, денеска изјави дека е потребна темелна и непристрасна истрага за употреба на хемиско оружје во Сирија.
Лавров на состанокот со катарскиот министер за надворешни работи во Москва, рече дека извештаите за употреба на хемиско оружје се појавиле откако екстремистите дошле до хемиско оружје.
– Тоа се случи откако борците на Исламска држава зазедоа такви фабрики во Ирак и во Либија. Сакаме тие наводи да се истражат темелно и непристрасно. Опасно е кога хемиското оружје ќе заврши во погрешни раце, чии било раце, затоа што хемиското оружје е забрането – рече Лавров.
Шефот на катарската дипломатија, Халид Бин Мухамед ал-Атијах, рече дека неговата земја смета дека режимот на претседателот Башар ал-Асад е нелегитимен и оти Сирија користела хемиско оружје.
