Минатата година полицијата открила 92 случаи на криумчарење мигранти, двојно повеќе во споредба со 2013 година, а кривични пријави биле поднесени против вкупно 166 лица, покажува статистиката на МВР.
Според евиденцијата на МВР, лани 1.750 лица илегално ја минале државната граница, во споредба со 1.132 лица во 2013 година. Од нив најмногу биле од Албанија (624), потоа од Сирија (570), од Авганистан (291) и од други земји од Блискиот и од Средниот Исток и од Северна Африка.
„Во однос на кривичното дело „организирање група и поттикнување на извршување на делата трговија со луѓе и криумчарење мигранти“, откриени се 17 вакви кривични дела, во кои кривично се пријавени 43 сторители, а во рамки на овие активности, детектирани се и четири криминални групи кои имале 28 членови и организирале криумчарење мигранти од Блискиот и од Средниот Исток и од Северна Африка во западноевропските земји“, информираат од Министерството.
Полицијата лани открила и 19 случаи и поднела пријави против 32 лица за кривичното дело злоупотреба на безвизниот режим со земји-членки на ЕУ и на Шенгенскиот договор.
Од МВР информираат дека во Прифатниот центар во Скопје се сместени 838 илегални мигранти.
