Кандидатот за премиер од Движењето „Самоопределување“, Албин Курти, се прогласи за победник на парламентарните избори во Косово, додавајќи дека третиот мандат ќе го продолжи во коалиција со партиите „Осмели се“ и „Алтернатива“. Изборите ги оцени како слободни, демократски и фер, пренесува „Порталб.мк“.
„Сè помина според процедурите, благодарам на полицијата и на органите на прогонот воопшто. Новата Влада ќе биде составена заедно со нашите коалиционери, а ние ќе ја продолжиме со работата што ја започнавме“, рече Курти.
Тој обвини дека неговата коалиција се соочува со хибридна војна.
„Граѓаните на Косово успешно го докажаа својот отпор дури и против невидената хибридна војна што се водеше против нашата коалиција, во која олигарсите трошеа пари без сметководство, им се закануваа на работниците и ги имавме најапсурдните можни ветувања во оваа кампања, кои создадоа ирационална атмосфера. Но и покрај сето ова, народот ќе победи“, рече Курти.
