Дел од меидумите во Република Србија го забележаа кумството во Охрид на манифестацијата Богојавление – Водици, на омилениот пејач во оваа земја, Жељко Јоксимовиќ.

Мегу другите, настанот го регистрираа „Вечерње новости“, како и еден од најчитаните интернет-портали на просторите на поранешна Југославија, српски „Курир“.

Самиот Јоксимовиќ, на крајот од манифестацијата, се огласи со објава на својот фејсбук-профил, во која напиша: „Сакам да им се заблагодарам на граѓаните на Македонија, кои ми укажаа вонредна чест со поканата да бидам кум на свеченостите за Водици – Богојавление во Охрид, како и на несекојдневното гостопримство и љубезност. Се гледаме наскоро“.

Организаторите на манифестацијата во Охрид, не можат да бидат задоволни од посетеноста. Реално, таа беше далеку од нивната проектирана бројка – 30.000. Причините треба дополнително да се истражуваат. Дали само дождот и времето, дали сите контраверзии и меѓусебните обвинувања непосредно пред манифестацијата или нешто друго? На медиумски план, кумството на Јоксимовиќ, сепак, донесе поени, иако со подобра промоција можеше да биде искористено далеку попродуктивно.