Полицијата се сомнева дека 63-годишен професор во штипско средно училиште извршил злоупотреба на службената положба и сексуално злоупотребил ученичка. СВР Штип му поднесе кривична пријава, како и на неговиот директор и на државна просветна инспекторка за непријавување кривично дело или сторител.
– Првопријавениот, како професор во училиштето, трипати во текот на 2014 година, злоупотребувајќи ја својата положба, извршил полови дејства на ученичка во училиштето, а директорот и третопријавената како државен инспектор, свесно пропуштиле да го пријават кривичото дело на надлежен орган, а за кое дознале при вршење на својата работа – изјави портпаролката на СВР Штип, Гордана Панајотова.
На сите им биле поднесени пријави до Основното јавно обвинителство.
Како што дознаваме, случајот е пријавен од ученичката, при редовна контрола на група инспектори во штипското училиште, кои кај сите структури (наставнички совет, родителски совет и ученички организации) се интрересирале за работењето на училиштето.