Премиерот Димитар Ковачевски најостро ги осудува вчерашните настани кај плоштадот „Скендербег“, за кои вели дека за голема среќа не резултирале фатално за граѓаните.
„Никаков револт не може да оправда употреба на огнено оружје од страна на цивили, каменување, оштетување државен имот, посегнување по нечиј живот. Изразувањето незадоволство преку мирно протестирање е уставно загарантирано право и оваа Влада досега повеќе пати покажала и докажала дека демократијата е во рацете на граѓаните и никој нема да им го ускрати тоа право“, наведува Ковачевски во денешната објава на Фејсбук.
Тој додава дека омразата и насилството не биле решение и никогаш нема да бидат решение за ништо. Ковачевски потсетува дека од последните случувања, и хулиганското однесување на улица има само еден губитник, а тоа е Република Северна Македонија.
„Ги повикувам политичките чинители да не ги вовлекуваат граѓаните во насилни протести, давајќи им лажни ветувања. Ваквите сценарија веќе нѝ се добро познати на сите нас. Вчера видовме страшен пример за политичари кој имаа несовладлива склоност да играат улога на жртва, поради голема желба за моќ. Ваквите “игри” го покажуваат вистинското лице на оние кои се кријат позади народот. Еден ден ги поттикнуваат на радикализам, веќе следниот се повлекуваат и оградуваат од граѓаните кои претходно ги изманипулирале. Ним сакам да им порачам – крвавите сцени во законодавниот дом, на улиците низ државата, се едно минато време кое е зад нас и на кое никогаш нема да дозволам да се вратиме“, вели Ковачевски.
Премиерот вели дека приоритети треба да нѝ бидат хармонијата и просперитот, а секој проблем да се решава низ дијалог, како што функционира секоја земја-членка на НАТО и земја чија иднина е ЕУ.
Ковачевски уште еднаш повторува дека Владата во ниту еден момент не го довела под знак прашалник македонскиот идентитет и македонскиот јазик во однос на европскиот предлог за почетокот на преговорите со ЕУ и дека се залагаат за европски вредности.
