Градоначалникот на Град Скопје, Коце Трајановски, градоначалникот на Општината Сарај, Беким Мурати, и директорите на јавните градски претпријатија денеска присуствуваа на акција за чистење и за уредување на реонскиот парк во Сарај.
Оваа акција во општината Сарај е дел од единаесеттиот циклус посети на општините на Град Скопје и средби со претставниците на урбаните и на месните заедници.
Овие три дена јавните претпријатија на Градот Скопје на територијата на општина Сарај, со луѓе и со механизација ќе работат на терен во областите на нивно дејствување.
– Посетите на овие општини и средбите со претставниците од месните и од урбаните заедници придонесоа за зголемување на ефикасноста на јавните претпријатија, но и за подобрувањето на соработката меѓу Општина Сарај од една, и Градот Скопје и јавните претпријатија од друга страна. Оваа соработка придонесе и за реализација на голем број проекти на територијата на Општина Сарај, проекти кои со децении се одложуваа. Најважен проект, секако е изградбата на новиот мост на реката Вардар помеѓу општините Сарај и Ѓорче Петров. Изминатиот период целосно ја реконструиравме и асфалтиравме и главната улица во село Крушопек, изграден е нов пат меѓу селата Копаница и Рашче, а поставено е и ново улично осветлување на патот од село Глумово до влезот на хидроцентралата „Матка“ – рече Трајановски.
Како дел од најголемите инфраструктурни проекти што ќе се реализираат на територијата на Сарај во 2015 година, градоначалникот Трајановски го наведе проектот за реконструкција и за проширување на главната улица во Сарај. Наредната година ќе се работи на изработка на проекти, по што ќе почне и неговата реализација.