Портпаролот на МВР, Иво Котевски, во телефонскиот разговор кој денеска го пушти Зоран Заев, на министерката Гордана Јанкулоска ѝ вели дека новинари го прашувале за убиството на Мартин Нешкоски.
„Овие морониве од „A1“ ме прашуваа за убиено дете на плоштад. Идиоти!“, вели Котевски.
„Ок, ајде да гледам „А1“, ајде чао“, одговара Јанкулоска.
Бидејќи овој телефонски разговор помеѓу Котевски и Јанкулоска е направен еден ден по изборите во 2011 година, убиеното дете на плоштад за кое зборува Котевски, е, најверојатно, Мартин Нешкоски.
Нешковски беше 22-годишно момче брутално претепано до смрт од припадник на специјалните полициски сили „Тигри“, Игор Спасов, за време на одржување на прославата на изборната победа на ВМРО-ДПМНЕ на плоштад „Македонија“ во 2011 година.
Голем број револтирани граѓани по убиството одржаа неколку протести против полициската бруталност и бараа одговорност за убиството на Нешкоски од институциите и оставка на министерката Гордана Јанкулоска.
