Марија Солозобова од Русија на виолина и Владислав Броневецки од Шпанија на пијано, ќе одржат концерт во „Св. Софија“, во рамките на „Охридско лето“.
Марија Солозобова е една од највпечатливите виолинистки на својата генерација, со кариера во постојан подем. Настапува во најпрестижните дворани во светот, како „Викторија хол“ во Женева, „Тонхале“ во Цирих, „Концертхаус“ во Виена, Големата сала на Конзерваториумот „Чајковски“ во Москва и други.
Владислав Броневецки дипломирал на конзерваториумот „Чајковски“ во Москва, каде добил и награда за најдобар студент што ја доделува оваа установа. Критиката ги нагласува неговата „префинета техника“ и „суптилната интерпретација“.
Синоќа во „Св. Софија“ концерт на класична гитара имаше Един Карамазов од Хрватска. Пред бројната публика, изведе дела од Агустин Бариос, Астор Пјацола, Питер Скулторп, Лео Брауер, Арво Парт и од Фернандо Сор.
