Американскиот сенат го усвои законот за покачување на задолжувањето на САД, со кој се зголемува горната граница на американскиот долг од 31,4 милијарди долари, пренесува Си-ен-ен. Веднаш по вчерашното усвојување на законот, американскиот претседател Џо Бајден го пофали Конгресот, додавајќи дека со нетрпение очекува да го потпише усвоениот закон во текот на денешниот ден.
Сенатот гласаше со 63 гласа „за“ и 36 „против“ за законот кој во средата го усвои и Претставничкиот дом на САД, по неколкумесечни несогласувања меѓу демократите и републиканците. Министерството за финансии претходно предупреди дека нема да може да ги плати обврските доколку до 5 јуни не се усвои соодветниот закон.
Инаку, досегашната граница на задолжување на САД беше натфрлена во средината на јануари, по што американското Министерство за финансии не можеше да позајмува повеќе пари. За да ги плати сметките навреме, Министерството за финансии воведе низа на вонредни мерки за да купи време пред политичките преговори меѓу демократите и републиканците во Конгресот во однос на преземањето акција за решавање на проблемот со должничкиот лимит.
Според новиот закон, ограничувањето на федералното задолжување ќе биде суспендирано до 1 јануари 2025 година. Ваквиот договор беше постигнат меѓу претседателот Џо Бајден и републиканскиот спикер на Претставничкиот дом Кевин Меккарти.
