Министерството за здравство и Комисијата за заразни болести одлучија да препорачаат до Владата сите досегашни мерки да останат на сила. Оваа одлука е донесена по денешниот состанок на кој беше разгледувана можноста за олеснување на мерките за превенција и заштита од корона вирусот.

„Трендот на нови случаи со Ковид-19 во следните два дена ќе биде разгледуван на состанокот на Комисијата за заразни болести во понеделник, по што ќе бидат дадени нови препораки до Владата за понатамошно постапување во однос на мерките“ – велат од Министерството за здравство.

Оттаму апелираат до граѓаните доследно да се придржуваат до мерките, да ја почитуваат забраната за групи поголеми од две лица, да се држи дистанца од најмалку 2 метра и задолжително да се носи заштитна опрема за лице во случај кога просторот помеѓу граѓаните е помал од пропишаното.

Денешниот број на новозаразени е 36 лица, додека пак, вкупниот број во земјава достигна до 1.622. Од вирусот закрепнаа 1.112, а почина 91 лице.