Колумбиската национална полиција запленила осум тони кокаин долж границата со Панама, соопштија властите во Богота. Како што пренесуваат светските медиуми, станува збор за една од најголемите заплени на кокаин во оваа земја, во изминатите неколку години.

Полициската акција за заплена на дрогата, според колумбиските власти, била изведена во подземно скривалиште на плантажа со банани во општината Турбо. Во операцијата биле уапсени три лица.

Министерот за одбрана на Колумбија, Луис Карлос Виљегас, изјавил дека дрогата му припаѓала на криминалниот клан Усуга. Соединетите Американски Држави имаат понудено награда од 5 милиони долари за фаќање на водачот на криминалната група.

Според податоците на Обединетите нации, годишно во Колумбија се произведуваат 442 тони кокаин. Минатата година колубиските власти успеале да запленат 252 тони наркотици.