Демократскиот кандидат за претседател на САД, Хилари Клинтон, истакна дека ако биде избрана, таа ќе ја обедини земјата.
– Работа ми е да ја обединам земјата – им рече Клинтон на новинарите додека влегуваше во авионот, заминувајќи на првиот од четирите митинзи на последниот ден на кампањата.
Клинтон истакна дека навистина сака да биде „претседател за сите“ и за тие што ќе гласаат за неа и за другите, што ќе гласаат против неа.
Демократската кандидатка за претседателка на САД е во водство од три процентни поени во однос на својот републикански противкандидат Доналд Трамп, покажуваат резултатите од завршната анкета на „Блумберг“.
Најновите истражувања покажуваат дека Клинтон ужива доверба кај 44 отсто од испитаниците, додека кон Трамп се наклонети 41 отсто.
Во САД, утре 225 милиони Американци со право на глас ќе одлучуваат помеѓу Хилари Клинтон и Доналд Трамп.
