Воведувањето на нови технологии во земјоделството e неопходнo за борба против климатските промени, бидејќи тие се сериозни закани по родот.
Ова беше истакнато на денешната прес-конференција на Сојуз на стопански комори (ССК), на која, исто така, беа дадени предлози за имплементација на нови технологии во секторот, кои ќе придонесат за ублажување на негативните последици.
Годинава, поради поволноста на временските услови, кои беа во одредена мера подобри од минатогодишните, се очекува подобар род, односно поголем принос по хектар од генерално просечниот принос од минатата година од 2,6 тони по хектар.
– Ова би значело намалување на потребата за увоз на пченица и на брашно, кое, за жал, во изминатите три години бележи тренд на зголемување. Само минатата година во Македонија беа увезени 97.538 тони пченица и 47.835 тони брашно и тоа во најголем процент од Србија – истакна претседателот на агро-бизнис комората при ССК, Огнен Оровчанец.
