Владата планира да додели финансиска поддршка за авиокомпаниите кои планираат да воведат нови летови од македонските аеродроми кон странство за периодот 2023-2025 година. Владата на денешната седница ја разгледа и усвои Информацијата во врска со потребата за донесување Програма за определување средства потребни за поттикнување и развој на воздушниот сообраќај на домашни и странски превозници и ја донесе Програмата.
„Донесена е и Уредба за начинот и критериумите за доделување финансиска поддршка на домашни и странски авиопревозници и потребната документација којашто треба да се достави од страна на корисниците на финансиската поддршка. Согласно овие одлуки, Владата, преку Министерството за транспорт и врски, во следниот период, ќе распише јавен повик за доделување финансиска поддршка за авиокомпании коишто ќе воведат нови авиодестинации за граѓаните“, информираат од владината прес-служба.
Инаку, на претходните три повици распишани од Владата победуваше унгарската нискобуџетна компанија „Визер“, која беше единствена што добиваше субвенции за воведување на нови летови од македонските аеродроми.
Министерот за транспорт и врски Благој Бочварски во два наврати есенва изјави дека ќе се менува моделот за субвенционирање на летовите според правилата за државна помош што ги има пропишано ЕУ. Најпрво во интервју за МИА, Бочварски во септември информираше дека новиот модел ќе овозможи да се пријават што е можно повеќе оператори, а предност во добивањето субвенции ќе им се даде на авиокомпаниите што ќе понудат поголеми воздухоплови, директни линии до поголеми аеродроми и повеќе летови неделно.
Ex-Yu Aviation и на крајот од октомври годинава ги пренесе информациите на министерот Бочварски дека новиот модел за доделување субвенции е утврден и дека се чека на владина согласност. Договорот за субвенционирање би ги обврзал авиокомпаниите што ќе добијат субвенции да ги одржуваат летовите дури и откога ќе заврши периодот на субвенционирање.
Инаку, унгарската нискобуџетна авиокомпанија „Визер“ доминира во воздухопловниот сектор во Македонија, со удел од над 60 отсто од вкупниот број на превезени патници годишно во авиосообраќајот.
