Кина денеска донесе контроверзен закон со кој се заострува контролата на дејствувањето на странските невладини организации.

Законот го изгласа Националниот народен конгрес, без разлика на тоа што странските влади и меѓународните организации изразија загриженост кога беше најавена зајакнатата контрола. Содржината на законот сè уште не е достапна за јавноста.

Кинеските медиуми претходно пренесоа дека власта ќе ги контролира активностите на сите невладини организации, кои според новиот закон ќе мора да доставуваат извештаи за работата.

САД, Канада и Европската Унија апелираа Кина да го ревидира овој закон, како и законот за кибернетичка безбедност.

Западните критики се однесуваа на тоа дека законот може сериозно да го ограничи дејствувањето на граѓанските и на групите за човекови права.

Во согласност со законот, кинеската полиција ќе може да ги забрани активностите на некои НВО, ако процени дека постои можност да ја загрозат државната безбедност. Најавено е дека на кинеските државјани ќе им се забрани да бидат членови на странски невладини организации, освен со специјална дозвола.

Законот се однесува и на професионалните здруженија и универзитети во Кина.