Во градови ширум Кина се поставуваат болнички кревети и се градат клиники за откривање треска, бидејќи властите пријавија уште пет смртни случаи, пишува Ројтерс. Меѓународната загриженост се зголеми после изненадувачката одлука на Пекинг да ги укине сите мерки и да го „ослободи“ вирусот. Кинеските власти овој месец го укинаа строгиот режим на локдаун по протестите против ограничувањата што го држеа вирусот под контрола три години, но за тоа општеството и втората по големина економија во светот платија голема цена.
Како што објавува Ројтерс, на населението кое брои 1,4 милијарди луѓе, му недостига природен имунитет кој бил долго време штитен. Расте загриженоста за можните смртни случаи, мутациите на вирусите и влијанието на целата ситуација врз економијата и трговијата.
„Секој нов епидемиски бран во друга земја носи ризик од нови варијанти. Сегашниот бран во Кина ќе биде голем“, рече Алекс Кук, продекан за истражување на државниот универзитет вво Сингапур, поточно од Школата за јавно здравје.
