Екипа на кичевската полиција вчера попладне извршила претрес на возило, сопственост на фирма од Скопје, и привела три лица кај кои биле пронајдени повеќе од 50 фалсификувани банкноти во апоени од 500 денари, информира МВР.

Претресот на возилото и на трите лица во него бил извршен по наредба на Основниот суд Кичево поради постоење основан сомнеж дека се превезуваат фалсификувани пари.

Како што информираат од МВР, вчера околу 16.15 часот на магистралниот пат Охрид – Кичево, полициски службеници извршиле претрес во автомобил марка „фолксваген голф“ сопственост на скопската фирма „Адријус“, кое го управувал 44-годишниот Т.А. од Скопје, а сопатници му биле Б.И. (45) од село Сарај и И.К. (47) од Скопје.

„При претресот на лицата и на возилото биле пронајдени 51 фалсификувана банкнота од 500 денари во чанта на И.К., нотес со евиденција каде ги пуштал во оптек, а уште три банкноти од 500 денари биле пронајдени во возилото. Лицата се приведени за понатамошна постапка“, стои во информацијата на МВР за случајот.