Комисијата за хартии од вредност (КХВ) на денешната седница донесе заклучок да ја прекине постапката за издавање дозвола за преземање на „Макпетрол“ од страна на „Балкан петролеум холдинг лимитед“, соопштуваат од КХВ.
Постапката била прекината заради, како што појаснуваат од комисијата, решавање на „претходно прашање“ кај друг надлежен државен орган.
– Ако КХВ како орган што ја води постапката, наиде на прашање, кое претставува самостојна правна целина во надлежност на друг орган, а без чие решение не може да се одлучи за поднесеното барање, КХВ ја прекинува постапката додека надлежниот орган не се изјасни по претходното прашање – се наведува во соопштението на комисијата.
Оттаму информираат дека постапката по барањето за издавање дозвола за преземање на „Макпетрол“, поднесено од „Балкан петролеум холдинг лимитед“, КХВ ќе ja продолжи откако надлежниот државен орган ќе донесе одлука во однос на претходното прашање.
