Уште едно кафуле доби казна од Општина Центар поради пуштање гласна музика. Минатата седмица Општина Центар соопшти дека изрекла мандатна глоба од 6.000 евра за кафе-барот „Интермецо“ во Капиштец, поради пуштање гласна музика во долг период наназад, а сега информира дека казна од 500 евра за пуштање гласна музика, односно надминување на дозволеното ниво за бучава, и изречена на локалот „Бруклински“.
Секторот за инспекциски работи на општината на 15 август извршил мерење на бучавата во локалот „Бруклински“, при што е констатирано надминување на граничните вредности. Во петокот, согласно Законот за заштита од бучава во животната средина, на правното лице Бруклински ДООЕЛ му е изречена паричната прекршочна глоба од 500 евра.
Општина Центар апелира до сите угостители, локали и нивниот менаџмент, да се придржуваат до важечките правилници и законски одредби, да ги почитуваат и да не ги надминуваат дозволените нивоа на гласност и бучава. Истовремено, предупредува дека инспекциските контроли за бучава ќе продолжат.
