Илјадници граѓани на Каталонија од рано утрово чекаат во редици пред изборните места за да гласаат на референдумот за независност на оваа богата шпанска покраина, во чие срце е Барселона, без разлика што шпанската власт го прогласи референдумот незаконски и презеде низа мерки за да го спречи.
Дел од граѓаните утрово блокирале врати на изборни места во случај полицијата да се обиде да го спречи гласањето. Избирачките места требаше се отворат во девет часот по локално време, но сè уште е неизвесно дали гласањето ќе биде одржано.
Шпанската полиција испрати засилување, а во Барселона уште од утрото кон Каталонија се упатени и стотици полициски возила. Изборната комисија за надгледување на гласањето е расформирана, а илјадници полицајци се распоредени да блокираат влез во изборни места.
Каталонската влада еден час пред почетокот на планираниот референдум соопшти дека тој ќе се одржи и ги повика избирачите да гласаат на кое било изборно место што ќе биде отворено, во случај шпанската полиција претходно да затвори избирачки места.
Шпанските власти претходно запленија гласачки материјал, но локални медиуми јавуваат дека на изборните места има нови гласачки кутии. Каталонскиот весник „Вангардија“ синоќа објави дека шпанската полиција упаднала во телекомуникацискиот и технолошки центар на каталонската влада. Вчера исто така од училиштата каде што требаше да се гласа, шпанската полиција вадеше граѓани и ги заклучуваше училиштата.
Локалните власти порачуваат дека планираат одржување на референдумот без оглед на сè и оти оние кои ги поддржуваат ги „бранат“ изборните места со различни активности.
Лидерот на Каталонија, Карлес Пуџдемон, вети дека референдумот за независност на Каталонија, во која живеат 7,5 милиони луѓе, ќе се одржи иако Уставниот суд на Шпанија одлучи дека гласањето е неуставно.
