Капацитетите на двата крајезерски туристички центри, Охрид и Струга, речиси целосно се распродадени за продолжениот велигденско-првомајски викенд.
Резервациите се направени од голем број туристи како од земјата, така и од странство. Резервирани се повеќе од 90 проценти од хотелските капацитетите.
Приватните издавачи на станови нудат сместување по цени од 400 денари за кревет до 50 евра за дневен закуп на апартман со повеќе легла.
По традиција, најбројни ќе бидат гостите од соседството, од Србија, Бугарија, Грција, но и од Турција и од Албанија.
Гостите од Западна Европа се очекува да пристигнат непосредно по празниците, со првата најава за пристигнување на првата група холандски туристи на 3 мај.
Од втората половина на мај се очекува поголем бран гости од Данска, Полска, Романија, Труција, Израел и од Велика Британија.
