Претседателот на Европската комисија, Жан-Клод Јункер, денеска го поздрави враќањето кон „нормален процес“ во преговорите меѓу Атина и ЕУ за финансиски спас на Грција, што, според него, отвора пат за поволен резултат и за двете страни.
„Морам да признаам дека бев многу песимистички настроен во изминатите неколку недели бидејќи немаше никаков напредок, но ние сега се вративме кон нормален процес“, изјави Јункер во обраќање пред Европскиот парламент во Брисел, пренесе „А1 он“.
Јункер изрази уверување дека ќе биде постигнато решение, што ќе биде истовремено во корист и за Грција и за ЕУ.
Според Јункер, во согласност со постигнатиот договор меѓу Атина и еврозоната, списокот со реформи ќе биде разгледан првин од претставниците на меѓународните кредитори на Грција ЕУ, ММФ и на ЕЦБ, пред да биде закажана средба на Еврогрупата за разгледување најдобар начин за постигнување напредок.
