Се трудиме да го унапредиме квалитетот на образованието, кое во минатото често беше причина за младите да си заминуваат во други земји барајќи подобри образовни можности. Ќе направиме крупни промени, но потребна е посилна соработка со сите чинители, а особено со универзитетите и бизнис заедницата, за да го стопираме процесот на миграција. Ова го истакна денеска министерката за образование и наука Весна Јаневска, истакнувајќи дека се работи за голем предизвик, со оглед дека за седум години во државата имало 17 илјади ученици помалку, а бројот на студенти е намален за 7 илјади. Податоците беа кажани на настан на Економскиот факултет во Скопје, на кој беа презентирани резултати од проектот „Skills4Justice“ што адресира прашања поврзани со миграцијата на населението, а се спроведува во рамки на програмата Хоризонт на Европската Унија.
„Министерството во моментов спроведува истражување во кое се вклучени сите државни универзитети и генерацијата дипломирани студенти во академската 2022/2023 година, за да видиме каков е степенот на вработливоста, односно дали овие студенти веќе се вработиле и за колку време по дипломирањето, дали стекнатите знаења и вештини им се применливи на работното место, дали се задоволни од приходите од работата и слично. Тоа ќе ни помогне да увидиме попрецизно каков квалитет продуцираат нашите универзитети и што е тоа што треба да се промени“, рече Јаневска.
Истражувањето треба да покаже дали се потребни нови студиски програми, дали е добро да се воведат интердисциплинарни студии, повеќе практична настава на одредени факултети, редефинирање на квотите.
Министерката информирала дека во процес на подготовка е нов Закон за високо образование, кој ќе биде добра основа за високото образование.
