Барем десет пати побарав од СЈО да ми ги достават сите записи од моите прислушувани разговори, но одговор не добив. Затоа се обратив до Народниот правобранител и тој ја побара информацијата од СЈО, рече обвинетиот Миле Јанакиески на судењето за случајот „Топлик“, односно за изградбата на „Сончев град“, објави „Фокус“.

– Одговорија дека доколку во листата се утврди дека мојот број бил прислушуван ќе бидеме известени. Ова значи дека се уште не е утврдено дали воопшто сум бил прислушуван. Токму затоа бараме автентично толкување на разговорите – рече Јанакиески.

Тој како раководно лице во Министерството за транспорт и врски, спротивно на Законот за јавни набавки составил Комисија за јавни наддавања на која и наложил да избере понудувач за купување и располагање со државно земјиште за изградба на елитниот комплекс Сончев град во Сопиште, иако фирмата не ги исполнувала условите за тоа.

Од доказите, според СЈО, произлегува дека поради раскинувањето на договорот по вина на Министерството, тоа се обврзало во да му исплати долг и затезна камата на правното лице „Сан сити“ во износ од еден милион евра.