Лицето што вчера предизвика инцидент на седницата на Советот на Општина Карпош, кое лажно се претстави како Ивица Ивановски, новинар на „Вечер“, е лице со име Никола Савовски. Тој е член на Социјалдемократскиот сојуз и бил на советничката листа на СДСМ со реден број 23 за време на локалните избори во 2013 година, истакна на денешната прес-конференција градоначалникот на Општина Карпош, Стевчо Јакимовски, по инцидентот што се случи на последната седница на Советот.
– На неговиот профил на „Фејсбук“ има ставено дека живее во Пјонгјанг. Тој не живее во Пјонгjанг туку во општина Центар, на улица Ленинова бр.25. По професија е доктор по ветерина. Интересно е да се напомене дека е братучед на Наташа Савова, а неговиот татко Савов и неговата мајка и двајцата се вработени во Општина Центар. Уште поинтересно е што и тој е вработен во Општина Центар во „Паркинзи на општина Центар“-ПОЦ и тоа од 01 јануари 2013 година е во редовен работен однос – рече Јакимовски.
Против него и против другите организатори на овој инцидент на седницата на Советот на Општина Карпош, рече Јакимовски, ќе биде поднесена кривична пријава.