Регистрирани сe 11.610 нови позитивни случаи од 35 градови во државата, со зголемување од 4,5 oтсто во однос на минатата недела. Процентот на позитивност се движи од 23,6 отсто до 34,4 отсто, односно просечно – 29,1 отсто, покажува неделниот извештај на Институтот за јавно здравје во периодот од 17 до 23 јануари.
Според извештајот, тестирани се 39.289 материјали во лабораториите во кои се спроведува молекуларно тестирање и антигенско тестирање за присуство на SARS-CoV-2, со намалување од 15,6 отсто во однос на минатата недела. Најголем дел од регистрираните случаи се од Скопје, а највисока неделна инциденца е регистрирана во Крушево. Процентот на позитивност се движи до 34,4 отсто.
„Регистрирани се заболени лица во сите возрасни групи. Најзастапени се возрасните групи на лица на возраст 30 – 39 години и 40 – 49 години. Најмал број е регистриран кај возрасната група од 0 – 9 години. Со статус „оздравени“ се стекнале 7.627 лица кои биле хоспитализирани или на домашно лекување“, стои во извештајот.
Во текот на минатата недела вкупно се пријавени 1.559 реинфекции, со зголемување од 25 отсто во однос на претходната недела. Пријавени се 97 смртни случаи во 20 градови во текот на изминатата недела, за 76,4 отсто повеќе во однос на минатата недела. Најголем дел од нив се од Скопје.
На 17 февруари лани започна вакцинацијата против ковид-19. Заклучно со 22 јануари годинава, вакцинирани се вкупно 864.759 лица со барем една доза на вакцина во државата и странство. Комплетно вакцинирани се вкупно 841.143 лица, а со трета доза се вакцинирани 122.752 лица.
Деталниот извештај на Институтот за јавно здравје за состојбата со ковид-19 се објавува на веб страницата на Институтот за јавно здравје: http://iph.mk/.
