Во рамките на чествувањата посветени на патронот на Охрид, св. Климент Охридски, синоќа беше отворена изложба на фотографии од Охрид во минатото. Изборот е направен од фотографии објавени на фејсбук-страницата „Охрид слики од минатото“, додека љубителите на фотографијата можат да ја погледаат во атрактивниот галериски простор на „Куќата на Уранија“.
Фејсбук-групата во 2010 година ја креираше Никола Зафировски, една е од најпопуларните и во моментов брои 5.500 членови, кои објавиле околу 2.000 фотографии од минатото на Охрид.
Најстарите фотографии од Охрид потекнуваат од 1863 година. Нив ги направила австриска научна експедиција, предводена од Јозеф Секељ.
Охриѓанецот Владо Жура, најстарата фотографија за Охрид ја поврзува со престојот на експедиција на Виенската академија на науките и уметностите во 1863 година во Охрид, која траела 10 дена, а биле направени само 11 фотографии од градот и од околината. Фотографиите биле поставени на Светската изложба во Париз во 1867 година. Фотографот Јозеф Секељ за тоа добил бронзен медал.
Свеченостите по повод празникот продолжуваат и вечерва, со манифестацијата „Сите кон Свети Климента“, а ќе завршат утре навечер, со свечена академија на која ќе бидат доделени Светиклиментовата награда и повелба.
Како што е веќе објавено, Светиклиментовата награда ќе му биде доделена на познатиот сликар Јордан Манасиески.
Интернационалниот биографски центар од Кембриџ, го забележа во книгата на најзначајни личности од светот за 2013 година, додека во последниве пет години, изложуваше во Париз, Токио, Њујорк, Фиренца и во други светските уметнички метрополи и салони, од каде се врати со ласкави признанија и награди. Меѓу другото, за своето дело „Молитва за радоста“, Мансиески ја доби специјалната награда на Јапонската асоцијација за современа уметност.
