Во продолжение ја пренесуваме проверката на „Вистиномер“ на исполнетост на изборно ветување на сегашниот градоначалник на општина Кавадарци, Митко Јанчев:
На крајот на септември 2021 година, во кампањата за локалните избори, градоначалникот на Кавадарци , Митко Јанчев на предизборен собир во Ваташа барајќи ја довербата за нов мандат, меѓу другото, вети и доизградба на спортската сала во ООУ „Димката Ангелов Габерот“:
Спортската сала е отпочната, ќе ја завршиме на почетокот на мандатот, во наредните три месеци. Очекуваме во месец јануари да биде пуштена во функција. Ќе добиеме спортска сала во којашто ќе ги има сите спортски реквизити за нашите дечиња да имаат солидно спортско образование…
[Извор:Фејсбук профил на градоначалникот на кавадарци Митко Јанчев (од 27,50 до 28,30 минута од видеото); Датум: 28.09.2021]
ОБРАЗЛОЖЕНИЕ:
Спортската сала во ООУ „Димката Ангелов Габерот“ во Ваташа е изградена и пуштена во употреба во јули минатата година (2022). Ова изборно ветување на градоначалникот на Кавадарци Митко Јанчев е исполнето, со забелешка дека тоа е сторено неколку месеци подоцна од изборно проектираниот рок за завршување на салата – јануари 2022 година.
Спортската салата почна да се гради летото пред локалните избори, на 31 август 2021 година, а беше целисно изградена и официјално предадена во употреба на 28 јули 2022 година. Салата е со површина од 400 квадратни метри и е опремена со современи спортски реквизити.
Информации и фотографии за ова се објавени во дел од медиумите и на веб-страницата на Општина Кавадарци.
Спортската сала се споменува и меѓу реализираните проекти во Отчетот (стр.3) на градоначалникот Јанчев за првата година од неговиот втор мандат. За реконструкцијата на овој спортски објект е наведено:
Изградба на Спортска сала во О.О.У „Димката Ангелов Габерот с.Ваташа, Кавадарци. После многу години, село Ваташа доби современа спортска сала.
ИЗВОРИ:
- Фејсбук профил на градоначалникот на кавадарци Митко Јанчев (28.09.2021): Изборен митинг во Ваташа (од 27,50 до 28,30 минута од видеото) [Проверено на: 27.01.2023]
- Канал 5 (31.08.2021): Јанчев: Се гради спортска сала во училиштето во с. Ваташа [Проверено на: 27.01.2023]
- Веб-страница на Општина Кавадарци (28.07.2022): Спортската сала во ООУ „Димката Ангелов Габерот“ с.Ваташа Кавадарци од денеска и официјално е предадена во функција [Проверено на: 27.01.2023]
- Дума.мк (28.07.2022): Училиштето во село Ваташа доби спортска сала (Видео) [Проверено на: 27.01.2023]
- Јутјуб – КТВ (28.07.2022): Пуштена во функција спортската сала во училиштето во село Ваташа [Проверено на: 27.01.2023]
- Веб-страница на Општина Кавадарци – Отчет на градоначалникот Митко Јанчев [Проверено на: 27.01.2023]
