Околу 225 милиони Американци денеска на претседателски избори ќе избираат помеѓу републиканецот Доналд Трамп и демократската кандидатка Хилари Клинтон.
Медиумите пишуваат, повикувајќи се на анкетите, дека изборите се неизвесни како никогаш досега, а најновата анкета на „Блумберг“ покажува дека Клинтон е во водство за три проценти во однос на Трамп.
Предизборната кампања ја одбележа беспоштедната борба на двајцата кандидати и постојаните меѓусебни обвинувања за неспособност, но и аферата за повторното отворање на ФБИ истрагата против Клинтон поради спорните употреби на приватната електронска пошта во службени цели.
Кампањата ја одбележаа и спорните изјави на Трамп за жените, бегалците, како и скандалот во врска со тоа дали избегнувал да плаќа данок, но и тврдењата дека Русија се обидува да влијае на исходот на изборите.
Републиканскиот кандидат Трамп, во изјава за „Фокс њуз“, се пошегува и рече дека „одлучил да гласа за Трамп“.
– Гледам надеж, соништа кои би можеле да бидат остварени со вистинскиот лидер. Добро ни оди во Северна Каролина, Флорида, Њу Хемпшир, Охајо. Којзнае што ќе се случи, но ќе добиеме доста држави – рече Трамп.
Претходно тој на својот твитер-профил напиша „Денеска ја правиме Америка повторно голема“.
TODAY WE MAKE AMERICA GREAT AGAIN!
— Donald J. Trump (@realDonaldTrump) November 8, 2016
Неговата противкандидатка Клинтон, пак, напиша „Не постои такво нешто како глас што не важи. Денеска може да направите разлика. Излезете да гласате“.
There's no such thing as a vote that doesn't count. Today, you can make the difference.
RT this—and go vote! https://t.co/tTgeqxNqYm pic.twitter.com/iTPel14CtU
— Hillary Clinton (@HillaryClinton) November 8, 2016
Победата во трката за прв човек на една од светските сили ќе ја однесе кандидатот кој ќе собере 270 електронски гласови.
Резултатот до самиот крај ќе биде неизвесен, а главна улога повторно ќе игра Флорида, која има 29 електорати.
