fbpx

Иванов, Вељаноски и политичките партии упатија честитки по повод празникот

-

Претседателот на Република Македонија, Ѓорге Иванов, по повод празникот Св. Климент Охридски, упати честитка до поглаварот на Македонската православна црква – Охридска архиепископија (МПЦ-ОА), архиепископот охридски и македонски г.г. Стефан.

„Свети Климент е основоположник на Охридската книжевна школа, чии ученици станаа учители на словенскиот свет. Оттогаш, па сè до денес, неговото дело е вградено во секоја буква што ќе ја напишеме и во секој збор што ќе го изговориме. Просветлувајќи нè, тој ни даде голема творечка и духовна слобода и ни остави богато духовно и културно наследство со кое ретко кој народ може да се пофали“, стои во честитката на Иванов.

Претседателот наведува дека св. Климент, учејќи нè на универзалните вредности и принципи на солидарност и на хуманост, нè повикува „да се обновиме со добрина и со чистота, и животот да ни биде достоен по светост, а не само по име да се нарекуваме христијани“.

„Наредната 2016 година треба да мине во знакот на одбележувањето на 1100-годишнината од упокојувањето на св. Климент Охридски. Сеќавајќи се на нашиот голем народен светител и учител, треба да останеме достојни на неговото наследство. А тоа ќе го постигнеме ако во сè што правиме се престигнуваме во добрина“, вели Иванов, додавајќи дека МПЦ- ОА, како чувар на споменот и наследството на св. Климент Охридски, има постојана задача да биде глас на мирот и на добрата мисла, утехата и на надежта во Република Македонија.

Честитка по повод празникот упати и претседателот на Собранието на Република Македонија, Трајко Вељаноски.

„Празникот посветен на свети Климент Охридски е почитување и уважување на делото на духовниот водач на македонскиот народ во историјата. Неговиот труд е безвременски, тој е придонес за христијанските вредности и за македонската национална култура. Создавањето на кирилското писмо кое просветли многу народи и стана движечка сила во христијанската богослужба е дел од плодовите на неговата работа кои како денес, така и во иднина ќе останат врежани во нашето историско наследство. Кога го празнуваме овој голем просветител да се потсетиме дека успешно ја продолжи мисијата на Светите браќа Кирил и Методиј во описменување и јакнење на христијанството кај луѓето, ја создаде Охридската архиепископија и Охридската книжевна школа кои се цивилизациски почеток на една светла епоха на ширење на христијанската вера“, стои во честитката на Вељаноски и се додава дека денешниот христијански празник треба биде водилка за уште поголеми достигнувања и промовирање на воспоставената традиција на заедничко почитување и помагање.

Пратеничката група на ВМРО-ДПМНЕ во честитката до граѓаните на Македонија истакна дека денот посветен на свети Климент Охридски е ден кога се одбележува неговата апостолска дејност и ден кога се афирмираат заедничките христијански и цивилизациски вредности на човекољубие и на надеж за подобар и попросперитен свет.

„Неговото дело не е само наше духовно и културно богатство, туку тоа е дел и од темелите на европската цивилизација и култура и претставува европски цивилизациски симбол. Големината на делото на Светиот Климент Охридски е долг кон него и претставува аманет и обврска кон идните генерации да ја почитуваат нашата традиција и духовно наследство, но и да го чуваат и шират духот на неговата мисија и дело за споделување со светот на нашата традиција и култура, како и нашето големо духовно и културно богатство“, пишува во честитката од пратеничката група на ВМРО-ДПМНЕ.

Лидерот на СДСМ, Зоран Заев, во својата честитка по повод празникот наведува дека делата на свети Климент Охридски нè обврзуваат сите да ги следиме, промовираме и заеднички да ги поттикнуваме патеките на меѓусебно разбирање, почитување и помагање.

„Чествувањето и почитувањето на делото на основоположникот на Охридската книжевна школа и творецот на кириличното писмо, свети Климент Охридски, кој целиот свој живот го посветил на просветителство и на описменување, е од огромно значење за зачувувањето и за унапредувањето на македонската култура и цивилизациските вредности со универзално значење. Со одбележувањето на овој ден, се потсетуваме и на суштинското значење на солидарноста и почитувањето на заедничките вредности кај луѓето“, стои во честитката од Заев.

Нашите вести во вашето сандаче

Секој ден во 17 ч. добивајте ги вестите од Новинската агенција Мета директно на вашата електронска адреса.

Ве молиме одберете на кој начин сакате да добивате информации од нас:
Можете да се отпишете од оваа листа преку линкот на крајот од нашите пораки.

ДИК нема да може сама да се справи со евентуални кибер напади и дезинформации

Кибер напади, дезинформации, логистички пречки - овие ризици се закана за кредибилитетот на изборните процеси, истакна денеска првиот човек на Државната изборна комисија (ДИК), Александар Даштевски. На денешната панел...