Претседателот Ѓорге Иванов ги повикува лидерите на политичките партии да покажат одговорност кон граѓаните и кон нивните и интересите на државата и да стават крај на политичката криза.
Политичкиот договор кој беше постигнат за таа цел има јасни рокови и обврски, се вели во јавниот апел на Иванов. Тој нагласува дека крајно време е доследно, без понатамошно одолжување, да го спроведат политичкиот Договор од Пржино.
Претседателот Иванов оценува дека е недозволиво несериозното однесување и немањето чувство за одговорност и за државност.
„Не може да се избегнуваат обврските од Договорот, а со тоа да се доведе во прашање европската и евроатланската перспектива, како и просперитетот на граѓаните на Република Македонија“, пишува во соопштението од кабинетот на Иванов.
Во соопштението се вели дека Македонија, регионот и Европа се соочуваат со сериозни предизвици и она што најмалку ни е потребно денес е продлабочување на политичката криза.