Претседателот Ѓорге Иванов при учеството на самитот „Брдо-Бриони процесот“ во Сараево истакнал дека како држава ги истрошивме сите наши ресурси за справување со мигрантите и дека во иднина очекува помош и поддршка.
– Армијата и полицијата ги користат буџетските средства кои се однесуваат на безбедносниот аспект на кризата. Хуманитарниот аспект го покриваат хуманитарните и меѓународни организации, наши домашни компании, хумани луѓе. Но, веќе сме исцрпени. Ако дојде втор бран мигранти тогаш мора да се најде начин многу поефикасно да се пристапи, многу побрзо да се менаџира целиот тој процес. Кога беше првиот бран имавме голема неусогласеност на европските институции, нивното функционирање и бавно реагирање за изнаоѓање решение – изјавил Иванов.
Тој додал дека во летните месеци се очекува поголем бран на бегалци од афричките земји и дека учесниците на самитот, сериозно го разгледувале ова прашање.
Иванов најавил дека следниот „Брдо – Бриони процес“ ќе биде во Македонија. Овој самит е инициран од Словенија и Хрватска во 2013 година, со цел регионална соработка и решавање на отворени прашања.
