Претседателот Ѓорге Иванов денеска во Софија ќе учествува и ќе има обраќање на Самитот на шефови на држави и на влади на земјите членки на Процесот за соработка во Југоисточна Европа. Самитот, кој одбележува 20 години од иницијативата и е насловен „ПСЈИЕ – 20 години клуч кон регионална соработка“, се одржува во рамките на бугарското претседателство.

Македонскиот претседател веќе се сретнал со својот бугарски колега, Росен Плевнелиев, кој е домаќин на Самитот, а утрово е предвидено да има средба и со премиерот на владата на Бугарија, Бојко Борисов.

На денешниот Самит лидерите од регионот ќе разговараат за поврзување на државите со патна и енергетска инфранструктура, како и за борбата против радикализмот и тероризмот.

Од денеска претседавањето со Процесот за соработка во Југоисточна Европа го презема Хрватска, чиј министер за надворешни работи Миро Ковач ги најави приоритетите на неговата земја.

– Ќе се фокусираме на солидарност за подобро решавање на мигрантската криза. Како второ ќе им помогнеме на земјите кандидати на патот кон Европската Унија. Сакаме да ги поддржиме нашите соседи и сакаме да станат членки на европското семејство – изјавил Ковач, пренесува „Телма“.