Во скопскиот Кривичен суд денеска продолжи главната расправа од судскиот процес за настаните во Диво Насеље во Куманово, од 9 и од 10 мај минатата година, и покрај интервенцијата на екипа на Итната помош, која била повикана откако шестмина обвинети се пожалиле на здравстени проблеми и на повреди, кои, наводно, ги добиле при транспортот од затворите каде издржуваат притвор.

Поради ова, нивните адвокати побарале одложување на денешното рочиште, но биле одбиени од судечкиот совет, откако медицинските екипи констатирале дека сите шестмина обвинети немаат никакви видливи или други повреди и дека се способни да го следат судењето.

„По преглед на доктор од итна медицинска помош, до судечкиот совет доставен е извештај, според кој, тројца од обвинетите што се пожалија на здравствени проблеми пред докторот кажале дека немаат потреба од никаква терапија и помош, додека тројца се пожалиле на болки во ’рбетот, по што им била дадена терапија и е констатирано дека сите шест обвинети немаат никакви видливи надворешни или други повреди и во моментот се способни да го следат судењето.
По добивање на извештајот, судечкиот совет констатирал дека не постојат причини расправата да биде одложена, па затоа со одлука на советот главната расправа продолжи со распит на заштитени сведоци, како што беше планирано, заради што истата е затворена за јавност“, стои во соопштението од Кривичниот суд.

Оттаму додаваат дека без да навлегуваат во причините за барањето на одбраната за одложување на главната расправа, ставот на судот е дека „какво било одолжување на постапката не е во корист на ниту една од странките во случајот“.

Судскиот процес против 29 обвинети во случајот „Диво Насеље“ почна на почетокот на февруари годинава. На почетокот на јуни, целиот процес почна одново откако обвинителството со овој случај го спои и предметот „Молња“, во кој осум лица се обвинети дека обезбедувале логистичка поддршка за кумановската група.

Во настаните во Куманово животите ги загубија осум припадници на специјалните полициски единици, а 37 беа ранети, додека во борбите со полицијата беа убиени 10 членови на вооружената група.